Grani gi den

A tapu 1 juli fu na yari disi wi sa memre taki 155 yari pesa wan kba ben kon na katibo ini Sranan. A pisi ten dati Sranantongo ben de a moro prenspari tongo di a pipel fu Sranan ben e taki. Teleki 1876 skoro ben e gi na ini Sranantongo. A de fu sari taki wi no e skrifi a tongo disi sofuru moro. Na baka ala den yari a fiti fu gi grani na den Orga nanga den sma di ben aswa fu gi a tongo a grani di fiti en. Na ini den yari di pesa a tongo fu wi ben abi diferenti nen. Ma na ini a pisi skrifi disi mi sa kari en soso: "Sranantongo".

Anitri kerki (EBGS)
Na ini a yari 1735 den fosi Doysri leriman fu Anitrikerki ben e kon wroko na ini Sranan. Wan fu den fosi sani di den leriman disi ben du, na leri taki a tongo di a mayoria fu den sma dya ben e taki. Baka dati den bigin skrifi buku na ini Sranantongo. Na ini a yari1777 den meki wan Sranantongo wortubuku syi krin fu dey. Na ini a yari 1781 furu singi den ben kenki poti na ini Sranantongo. Na ini a yari 1874 den kenki a Nyun Testamenti kon poti na ini Sranantongo. Na ini a yari 1800 na 300 anitrisingi den ben kenki poti keba na ini Sranantongo. Sensi a yari 1852 ala mun Anitrikerki ben pristeri wan koranti: ‘Maksien vo Kristensoema’. Ala mun na 1500 fu a munkoranti disi den ben e meki.
Ma na moro bigi kado di Anitrikerki gi Sranan na den furu singi na ini Sranantongo. Wan fu den moro bekenti wan na „Da lobi fu wi kondre“. A singi di furu sma sabi leki: ‚Mi kondre tru wi lobi yu“.

Papa Koenders
Julius Gustaaf Arnout Koenders - soleki fa papa Koenders ben nen - syi krin fu dey natapu 1 mart 1886. Natapu 17 november 1957 a ben tapu en ay fu teygo. Koenders di ben de skoromeyster ben teki en leki wan wroko fu meki moro sma leri en gebroyki Sranantongo, fu na so fasi a tongo ben sa ori stan. Wan fu den fasi fa a ben du dati, ben de taki tin yari langa -fu mèi 1946 te kon miti aprel 1956 - a ben kon na doro nanga na munkortanti ‘Foetoe boi’. Ma sosrefi a ben opo a orga Pohama. Ala yari - syatu bifo manspasidey - den memre fu na orga disi ben ori wan Srananneti. Furu fu den sma di ben de fu syi na den neti disi bakaten kisi bigi nen na ini Sranan; sma leki Eddy Bruma, Sophie Redmond nanga Jules Wijdenbosch. Papa Koenders du furu sani, ma a moro prenspari wan na taki, tangi fu en, meki furu tra kulturugrupu syi krin fu dey; orga leki: Wie Eegie Sanie, Kra nanga Wi na wi.

Max Nijman nanga Suripop
Mi breyti srefisrefi taki tide na a dey wi abi na singi èn skrifiman orga "Suripop". A de wan tumusi bun sani taki, tangi fu na orga disi, Sranansma leri fu singi èn warderi na Sranantongo. Suripop gi Sranan wan eygi fesi te wi e taki fu singi nanga skrifisingi tori. Sondro fu tyari dor’ay na den singiman leki Big Jones, Johan Zebeda nanga Lieve Hugo mi denki taki wi mu gi Max Nijman bigi grani fu di wi kon so fara.

Furu sma no sabi na bigi wroko di masra Nijman du. Na ini wan ten pe furu yongu Sranan singiman ben wan de Sranan Pat Boone, Sranan Elvis Presley, Sranan Joe Tex, Sranan Brook Benton, sobu p’pokay fu Amerikan singiman, Max Nijman ben sabi en eygi warti. A tan èn srefi en leki wan dyadya Srananman a tan skrifi èn singi en eygi singi na ini Sranantongo. Tide furu sma no sabi moro suma ben de Sranan Joe Tex, noso Sranan Elvis Presley, ma wi ala sabi suma na Max Nijman. Mi no denki taki furu sma e libi na ini Sranan di no sabi èn lobi den singi “Ay Sranan” nanga “Adyosi”. A ben de wan tumusi bigi prisiri gi mi fu syi taki ala leysi te Max Nijman ben de na ini Sranan a ben kan span Anthony Nesty sporthal. So masra Max Nijman ori en krown na tapu en ede, sosrefi now, baka en kriboy adyosi.

A moy fu Sranantongo
Na ondro ala folku skrifiman habi wan spesrutu presi. Furu furu leysi na den e sori wi na moy fu wan tongo. So wi mu tan gi den skrifiman grani. Sma leki Dobru, Edgar Cairo nanga Michael Slory. Ma un sabi wan skrifiman noso skrifiuma di e prodo so nanga wi tongo leki Celestine Raalte? Ma tangi fu papa Koenders nanga Jan Voorhoeve na skrifikoni fu Henry de Ziel (Trefossa) no go lasi. Baka di Trefossa go sribi fu têgo a sabiman fu na Sranantongo professor Jan Voorhoeve bem meki kondre sabi taki Trefosso skrifi den moro moy puwema di oyti en ben leysi.

A yari na 1999. Na ini Aga (Den Haag) furu ondru uma miti makandra fu teki prati na a pipel-konferenti fu IPDC. Un kan ferstan fa den Sranan uma di ben de drape ben ferwondru en breyti di misi Hillary Clinton na ini en opowortu leysi na puwema “Uma” fu wi eygi Johanna Shouten-Elsenhout na ini Sranantongo. Dusun tra puwema ben de di misi Clinton ben kan gebroyki, ma spesrutu a puwema fu misi Elsenhout ben fiti en ay nanga en tongo.

Ma no meki wi fergiti sosrefi na bigi wroko fu Gracia Blanker nanga Jaap Dubbeldam. Furu sma – na ini wi libitem - bem taki tak’ den ben o skrifi wan Sranantongowortubuku. Den no du dati, ma den tu suma disi presenteri wi wan buku di e yepi furu sma te den e suku Srananwortu.

A de fanowdu fu kraka a orga NAKS di moro leki 60 yari e aswa fu gi Sranantongo a presi di a fiti fu kisi na ini Sranan nanga na ini grontapu. Furu sma aswa gi na Sranantongo. Wi no kan kari ala nen, ma den sma di mi sa kari now abi den ferdinste: Julius Defares, Rudie de Bruin, Wilfred Gimmer, Charlotte Amalia Eleonora Wijdenbosch-Monkau, Harold Braam, Wilfred Teixeira, Romeo Grot, Lucia Breeveld, Hein Eersel, Monica Drenth, Eddy van der Hillst nanga Alexander de Drie. Furu moro sma nen mi ben sa musu fu kari ma fu di a pisi skrifi no kan langa tumusi mi e begi primisi. Mi e aksi fu no mandi mi.

Leki fa un syi nofo sma syi a moy fu a Sranantongo, ma toku wan wan leysi yu e yere sma e taki tak‘ Sranantongo na wan grofu tongo. Ondro den sma disi yu abi sma di taki tak’ den leri. Ma wi granwan ben leri wi keba taki leri no e puru don.
Fa wi kan lespeki Sranantongo?

Wi ala kan yepi fu gi Sranantongo a warderi di fiti. Wi kan du dati te wi sa tan skrifi “Yu” na presi fu “Joe”. “Sranan” prefu “Sranang”. “Lobi” prefu “lobbi”, “mi” prefu “mie”, “wan” prefu “wang”. Efu a kan teki wan syatu skoro fu sabi fa fu skrifi Sranan leki fa a fiti. A kan taki sma as feni taki mi srefi meki fotu na ini na pisi skrifi disi. Ma mi feni taki wi sa musu fu skrifi na tongo morotron. A moro bun yu skrifi na tongo nanga wan tu fotu leki noyti yu e skrifi en. A no kan taki na 2 noso 3 sma nomo sabi fa fu skrifi na tongo. Efu dati sa tan so dan te fu keba dan a tongo sa dede gowe nanga den 2 noso 3 sma dati. So gi grani na den die ferdini dati, ma proberi gi yu srefi fu taki èn skrifi Sranantongo moro bun.

Hans Breeveld
(hansbreeveld@gmail.com)